Pagpunta sa apat na lugar ng protesta

PAGPUNTA SA APAT NA LUGAR NG PROTESTA

mula Luneta, Mendiola, Edsa Shrine hanggang PPM

ay inikot ko ang mga iyon upang ikampanya

ang December 9 International Anti-Corruption Day

nagbabakasakaling mapabatid sa taumbayan

ang pandaigdigang araw laban sa katiwalian

ang apat na lugar ng protesta'y aking pinuntahan

habang tangan ko yaong tarpolin na magkabilaan

nalitratuhan, nabasa ng tanan, kinapanayam

paalalang ang UN ay may petsang pandaigdigan

laban sa mga mandarambong, kurakot at gahaman

umaga, Luneta; tanghali, Mendiola; hapon, Edsa

Shrine at PPM hanggang gabi, sana nama'y magbunga

ang kapangahasan ko't magsilabasan sa kalsada

lahat ng galit sa kurakot at bulok na sistema

wakasan ang korapsyon, hanggang makamtan ang hustisya

- gregoriovbituinjr

11.30.2025

* ang unang litrato ay kuha ni kasamang Warren nang magkita kami sa People Power Monument (PPM) ng hapon ng Kaarawan ni Bonifacio, ang ikalawa'y selfie ng makatang galâ

Yaman ng taas, galing lahat sa ibaba!

YAMAN NG TAAS, GALING LAHAT SA IBABA!

pinanood ko ang kanilang pagtatanghal

at napukaw ako sa kanilang liriko:

"Yaman ng taas, galing lahat sa ibaba!"

katotohanang dapat nating isadiwa

buti't binidyo ko ang pagtatanghal nila

upang katotohanan sa kanilang kanta

ay maibahagi sa malawak na masa

na nais mabago ang bulok na sistema

nabidyo ko sila sa screen sa Edsa Shrine

habang naroon ang mga senior citizens

nagtanghal ay nasa People Power Monument

kaya sa P.P.M. ako'y nagtungo na rin

sa Morobeats, taaskamaong pagpupugay

kayong rapper sa masa'y talagang kahanay

kalagayan ng madla'y batid ninyong tunay

kaya mga inawit n'yo'y buhay na buhay

mga inawit nila'y ating pagnilayan:

"Yaman ng taas, galing lahat sa ibaba!"

yumaman ang taas sa pagsasamantala

sa manggagawa, magsasaka, maralita

kaya dapat baguhin ang sistemang bulok

huwag nang iboto ang mga trapong bugok

galing sa masa'y ating ilagay sa tuktok

upang pagsasamantala'y lagyan ng tuldok

- gregoriovbituinjr.

11.30.2025

* mapapanood ang bidyo sa kawing na: https://www.facebook.com/share/v/1AAwnWj86Q/ 

Tayo'y mga anak ni Bonifacio

TAYO'Y MGA ANAK NI BONIFACIO

ngayong araw ng bayaning Gat Andres Bonifacio

ipakitang tunay na mga anak niya tayo,

anak ng bayan, ayon iyan sa tagapangulo

ng Partido Lakas ng Masa, Ka Sonny Melencio

Supremo'y di bulag o pipi, o kaya'y nahiya

pagkat kanyang tinatag ang Katipunang dakila

nang wakasan ang pagsasamantala ng Kastila

upang bayan ay mag-alsa't tuluyan nang lumaya

salamat, Ka Sonny, sa paalala mo sa amin

kaya mga kurakot ay binabatikos man din

ang mga buwaya't buwitre sa gobyerno natin

ay raralihan, tutuligsain, papanagutin

hanggang kamtin ng bayan ang asam ng Katipunan

na malayang bansang walang mapang-api't gahaman

na walang tiwali't kurakot sa pondo ng bayan

di makakapamuno ang kurakot at kawatan

sila'y di na natin hahayaang magsamantala

di na dapat mamayagpag ang mga dinastiya

di naman tayo mararahas basta may hustisya

ang nais lang natin ay makatarungang sistema

- gregoriovbituinjr.

11.30.2025

Taas-kamao

TAAS-KAMAO

nagpupugay ako sa lahat ng dadalo

sa pagkilos ng masa sa Nobyembre Trenta

laban sa mga kurakot na pulitiko

masa'y lumahok man sa Luneta o Edsa

tungong pangarap na lipunang makatao

tungong pangarap na mabago ang sistema

na mawalâ ang mga buktot sa gobyerno

na mawalâ ang mismong kurakot talaga

pagsaludo, taas-kamaong pagpupugay

dahil nagpapatuloy ang ningas ng galit

ng masa, huwag itong hayaang mamatay

dahil ginawa sa bansa'y napakalupit

dapat mapanagot ang mga walanghiyâ!

sigaw natin: ikulong lahat ng kurakot!

lalo't trapo't dinastiya'y kasumpa-sumpâ

tiyaking mga sangkot ay di makalusot

- gregoriovbituinjr.

11.29.2025

Lunsad-aklat sa rali

LUNSAD-AKLAT SA RALI

Nailunsad din ang 40-pahinang aklat kong "Malayang Salin ng mga Tulâ ng Makatang Palestino" ngayong Nobyembre 29, 2025, International Day of Solidarity with the Palestinian People, sa pagkilos ng iba't ibang grupo kaninang umaga sa Liwasang Bonifacio sa Maynilâ.

Isa ako sa mga nagbigay ng pahayag sa pamamagitan ng pagtulâ. May iba ring bumigkas ng tulâ, umawit at sumayaw. Kasabay ng paglulunsad ng aklat ay binigkas ko roon ang tulang "Isulat n'yo po ang pangalan ko sa aking binti, Inay" na salin ko ng tulâ ng makatang Palestinong si Zayna Azam, at binigkas ko rin ang isa pang tulang katha ko hinggil sa pakikibaka ng mga Palestino.

Maraming salamat sa lahat ng mga sumuporta at bumili ng munti kong aklat ng salin ng tula ng mga makatang Palestino. Mabuhay kayo!

    

Pakikiisa sa mga Palestino

PAKIKIISA SA MGA PALESTINO

taospuso pong nakikiisa

upang lumaya ang Palestino

laban sa sumakop sa kanila

na krimeng malala'y dyenosidyo

araw nila'y sisikat, kakamtin

ang paglaya, "Mula ilog hanggang

dagat, lalaya rin ang Palestine!"

hiyaw naming buong katatagan

pinagtibay ng United Nations

itong Nobyembre Bente Nuwebe

bilang araw ng pakikiisa

sa lahat ng mga Palestino

kaya pakikibaka'y patuloy

upang sumakop ay mapaalis

nang-aagaw ng lupa'y mataboy

dahil di sila "anak ng Diyos"

kundi mga hambog at palalo

mga demonyo dito sa lupa

Philippine, Palestine, magkaisa

para sa makataong sistema

- gregoriovbituinjr.

11.29.2025

* November 29 - International Day of Solidarity with the Palestinian People

Wala sa impyerno ang demonyo, ayon kay Shakespeare

WALA SA IMPYERNO ANG DEMONYO, AYON KAY SHAKESPEARE

"Hell is empty and all the devils are here." - William Shakespeare , The Tempest

wala naman daw demonyo sa impyerno

ani Shakespeare, na isang makatang henyo

nasa mundo na raw lahat ng diyablo

tulad ng mga kurakot sa gobyerno

nakaluluha nga ang katotohanang

sinabi ng makatâ, kaya ang bayan

ay galit na galit sa nangyaring iyan

tuligsa'y mga sangkot na lingkod bayan

anong dami ng kontraktor na demonyo

na nagkalat din sa Kongreso't Senado

akala mo'y flood control ay nagmumulto

iyon pala'y ghost pagkat walang proyekto

O, Shakespeare, anong sakit mong magsalitâ

ng katotohanan, tunay kang dakilâ

habang itong bansa'y nagdurusang lubhâ

dahil dinemonyo ng trapong kuhilà

- gregoriovbituinjr.

11.28.2025

* larawan mula sa google

Pag Biyernes, ikalima ng hapon sa Edsa Shrine

PAG BIYERNES, IKALIMA NG HAPON SA EDSA SHRINE

ilang Biyernes ng gabi na bang ako'y tumulâ 

sa Edsa Shrine na ang kasama'y ilang kabataan 

alas-singko ng hapon ay hinahabol kong sadyâ 

maikling programa, bago alas-sais tapos na

isa itong commitment para sa literatura

katapatan sa panitik nitong abang makatâ

katapatan sa pakikibaka laban sa mga

kurakot, buwaya, buwitre, at tusong kuhilà

binigyan ako ng pambihirang pagkakataon

ng kasaysayan upang tumulâ para sa nasyon

basta makatulâ lang, kahit butas ng karayom

ay papasukin, titiyaking makatulâ roon

ganyan lang kapayak ang buhay ng abang makatâ

anumang larangan, isyu't paksâ, handang tumulâ

bawat Biyernes ng hapon, tiyak manunuligsa

ng mga kurakot, araw-gabi mang naglulupâ

- gregoriovbituinjr.

11.28.2025

Sa mga bagong pangalan sa Bantayog

SA MGA BAGONG PANGALAN SA BANTAYOG

taaskamaong pagpupugay sa lahat

ng mga bagong pangalang iuukit

doon sa Bantayog ng mga Bayani

sa Nobyembre ng taon kasalukuyan

Nolito H. Acebedo

Nonito A. Aguirre Sr.

Alex Boncayao

Jorge L. Cabardo

Ma. Leticia T. Celestino

Susan Fernandez

Yolanda H. Gordula

Bartolome S. Pasion

Francisco Portem

Roger C. Salas

Carlito R. Semilla

dalawa sa kanila'y naisulat ko

tula't talambuhay ni Alex Boncayao

higit isang dekada nang nakaraan

at ang librong sinalin ko sa Tagalog:

talambuhay ni Bartolome S. Pasion

pagpupugay sa mga bagong bayani

nakibaka sa maling pamamahala

lumaban sa mabangis na diktadura

lumaban upang baguhin ang sistema

ang pagkaukit ng kanilang pangalan

ay palatandaan ng kabayanihan

at ganap na pagkilala nitong bayan

sa nangarap ng makataong lipunan

O, sa inyo, na aming bagong bayani

ang inyong laban ay tinutuloy namin

hanggang makataong lipunan ay kamtin

pagsasamantala'y tuluyang pawiin

tungo sa makataong kinabukasan

walang pang-aapi sa sangkatauhan

mabuhay kayo, mga bayaning hirang

sa inyo'y taospusong pasasalamat

- gregoriovbituinjr.

11.28.2025

Nanlaban o di nakalaban?

NANLABAN O DI MAKALABAN?

ang sabi, sila'y nanlaban

sila ba'y nakapanlaban?

o di sila makalaban?

pagkat agad binanatan...

- gregoriovbituinjr.

11.27.2025

* litrato mula sa google

Tahimik na gawain

TAHIMIK NA GAWAIN

kung di kumikilos sa rali sa lansangan

ay binubuhos ang panahon sa pagtulâ

kung di nagbabasa sa sariling aklatan

ay pinagninilayan ang anumang paksâ

kung di nakikibaka laban sa kurakot

nagpapakain ng mga pusà sa labas

kung di sumisigaw laban sa trapo't buktot

naghahanda ng mga gulay pampalakas

kung di lumalahok sa pagkilos ng dukhâ

nagsasalin naman ng akda't dokumento

kung di isang lider ng grupong maralitâ

maglalakad ako't lilibutin ang mundo

kung di pa mababago ang sistemang bulok

tutok ko'y sa sipnayan o matematika

kung ang dukha'y di pa mailagay sa tuktok

anang kantang Tatsulok, maglalaba muna

- gregoriovbituinjr.

11.27.2025

Alam n'yo ba bakit namumula ang aking mukhâ?

ALAM N'YO BA BAKIT NAMUMULA ANG AKING MUKHA?

alam n'yo ba bakit namumula ang aking mukhâ?

pagkat kaytagal nang nilalait ang aking tulâ

walâ raw sa toreng garing, kampi sa manggagawà 

pulos pakikibaka, palibhasa'y isang dukhâ

ayaw nilang pabigkasin ng tulâ ang tulad ko

pagkat ayaw nilang marinig kung anong totoo

ayaw nilang dinggin ang panunuligsâ sa trapo

ayaw tanggapin ang nilalakò kong pagbabago

unang bira sa akin, katha'y pulos tugma't sukat

ang mga parikala'y kung saan-saan nagbuhat

bakit daw pulos manggagawa't dukha'y minumulat

at binibira ang panginoong burgesya't lahat

pagkat sila ang tiyak na unang matatamaan

silang mga kawatan sa pondo ng ating bayan

silang maliliit na kasabwat sa kurakutan

silang mga lider nitong pulitikong kawatan

ngunit sa pagtulâ ko'y nakatindig ng marangal

bagamat pag tumutulâ minsan ay nauutal

habang tinutuligsa ang dinastiya't kriminal

di ko tatantanan iyang mga trapong pusakal

- gregoriovbituinjr.

11.25.2025

Pangangarap ng gising

PANGANGARAP NG GISING

patuloy ang pangangarap ng gising

mabuti't nangangarap, di na himbing

lalo't pakikibaka'y tumitining

laban sa korapsyon ng magagaling

dapat may pagbabago na sa bayan

lalo na't galit na ang sambayanan

sa trapo't oligarkiyang gahaman

sa dinastiya't burgesyang kawatan

itayo ang lipunang makatao

walang pagsasamantala ng tao

sa tao, di naghihirap ang tao

ang bawat isa'y nagpapakatao

talagang mayaman ang Pilipinas

ngunit kayhirap ng bayang dinahas

hinalal na pulitiko'y naghudas

na pondo'y ninakaw nilang madalas

kaya baguhin natin ang sistema

wakasan ang dinastiya, burgesya,

elitista't tusong oligarkiya

silang yumaman sa likha ng masa

- gregoriovbituinjr.

11.25.2025

Hustisya'y bakit pangmayaman lang?

HUSTISYA'Y BAKIT PANGMAYAMAN LANG?

"At ang hustisya ay para lang sa mayaman!"

- mula sa awiting Tatsulok ng Buklod

buti pa ang / mayayaman, / may due process

kapag dukha, / kulong agad, / anong bilis

nalaglag na / sampung piso / ang pinulot

ninakaw na! / kulong agad / at nanagot!

isang balot / lang na monay / o pandesal

dahil gutom / yaong anak / niyang mahal

ang hiningi, / ninakaw daw / ng kriminal

ba't pag dukha, / turing agad / ay pusakal?

 

bilyong bilyong / pisong pondo / nitong bayan

na ninakaw / ng senaTONg / at TONGgresman

may due process, / di makulong / ang kawatan

hay, sa bansa / ang hustisya'y / bakit ganyan?

baguhin na / itong bulok / na sistema

pagkat tila / pangmayaman / ang hustisya

ang bulok na / lipunan ay / palitan na

nang hustisya'y / matamo rin / nitong masa

- gregoriovbituinjr.

11.24.2025

* litrato kuha sa Fiesta Carnival, Cubao, QC

Buwaya, buwitre, at ulupong

BUWAYA, BUWITRE, AT ULUPONG

parang holdaper ng buong nasyon

na harap-harapan ang insersyon

at pagkawat sa pondong dinambong

ng buwaya, buwitre't ulupong

nagkwentuhan ang kunwari'y lingkod:

Buwaya: "Di pa kami mabusog!"

Buwitre: "Di rin kami mabusog!"

Ulupong: "Pag busog na'y tutulog!"

ang mga buwaya'y tuwang-tuwâ

sa sinagpang na pondo ng bansâ

nagbundatan na ang walanghiyâ

at nagsikapalan din ang mukhâ

nanginain ang mga buwitre

ng buwis kaya di makangisi

pondo ng bayan ay sinalbahe

nilang masisibà araw-gabi

at sinagpang ng mga ulupong

ang kaban ng bayan, kinuratong

ng kontrakTONG, TONGresman, senaTONG

ulo nila'y dapat nang gumulong!

- gregoriovbituinjr.

11.24.2025

Ako ma'y isang tinig sa ilang

AKO MA'Y ISANG TINIG SA ILANG

ako'y isa raw tinig sa ilang

walang nakikinig, tila hunghang

kayraming tao sa kalunsuran

ay tila ba nasa kaparangan 

salitâ nang salitâ nang gising

tulâ ng tulâ ay nanggigising

ng mga tulog na kaisipan

ng mga himbing pa sa higaan

sumisigaw laban sa kurakot

na di napapakinggan ng buktot

na trapo, burgesya, dinastiya,

tusong kuhilà, oligarkiya

nananatiling tinig sa ilang

ang makatang di pinakikinggan 

- gregoriovbituinjr.

11.23.2025

Magkaisa laban sa mga korap

MAGKAISA LABAN SA MGA KORAP

magkaisa laban sa mga mapagpanggap

na lingkod bayang sa masa'y pawang pahirap

silang sa pondo ng bayan nagpakasarap

anak nilang nepo'y pulos luhò ang lasap

korapsyon ay patuloy nating tuligsain

tao'y sadyang galit na sa kanilang krimen

sa bayan, nalikhang poot ay tumitining

galit ng mahihirap lalo pang iigting

sobra na, tama na, wakasan ang korapsyon

ibagsak ang buwitreng sa pondo lumamon

ibagsak ang buwayang yumurak sa nasyon

ibagsak ang ahas na buwis ang nilulon

panahon nang magkaisa ng mahihirap

upang maitatag ang lipunang pangarap

palitan na ang sistemang walang paglingap

sa masa na ang buhay ay aandap-andap

- gregoriovbituinjr.

11.23.2025

* alay sa National Poetry Day, 11.22.2025

Maralita laban sa korapsyon!

MARALITA LABAN SA KURAPSYON!

panahon na ngang ating labanan

ang mga kuhila't tampalasan

palitan ang bulok na lipunan

palitan din ang pamahalaan

kinurakot nga ng mga korap

ang buwis natin sa isang kisap

mata, ang pondo'y nawalang ganap

mas naging dehado ang mahirap

buwis ng bayan ang kinurakot

ng mga talipandas at buktot

buwis ng dukha'y pinaghuhuthot

ng lingkod bayang pawang balakyot

marunong ding magalit ang dukha

imbes pondo'y sa bahay at lupa

ang pondo'y kinurakot ngang sadya

ng mga pulitikong kuhila

O, maralita, magalit ka na!

ibagsak na ang oligarkiya,

gahaman, dinastiya, burgesya

baguhin ang bulok na sistema!

- gregoriovbituinjr.

11.22.2025 (National Poetry Day)

Sa Ngalan Ng Tula (ngayong National Poetry Day 2025)

SA NGALAN NG TULA (ngayong National Poetry Day 2025)

ngayong National Poetry Day, tula'y bibigkasin

sa pagtitipon ng kabataang kasama natin

o kaya'y sa pagtitipon ng mga maralita

sa isang komunidad, ngunit konsyerto na'y wala

kasabay ng bertdey ni Jose Corazon de Jesus

unang hari ng Balagtasan, kayhusay na lubos

tema ngayon: "Tula't Tuligsâ Laban sa Korapsyon"

pumapaksa sa mga pulitikong mandarambong

tuligsa laban sa buwayang walang kabusugan

mga kontraktor, senador, konggresistang kawatan

dahil sa bahâ, nabisto ang isyung ghost flood control

na pondo ng bayan ay sa pansarili ginugol

ng mga lingkod bayang buwis nati'y binuriki

ng mga dinastiyang di na dapat manatili

anang makatâ: parusahan ang lahat ng buktot!

sigaw ng masa: ikulong na 'yang mga kurakot!

- gregoriovbituinjr.

11.22.2025

4 na tulang pangkabataan laban sa korapsyon

4 NA TULANG PANGKABATAAN LABAN SA KORAPSYON

(alay sa National Poetry Day, Nobyembre 22, 2025)

Tula 1

NAIS NG KABATAAN

(7 syllables per line)

ang mga kabataan

ang pag-asa ng bayan

ani Gat Jose Rizal

na bayaning marangal

ayaw ng kabataan

kaban ay ninakawan

ng mga lingkod bayang

nagsisilbi sa ilan

kaya aming nilandas

ang pangarap na wagas:

isang lipunang patas

at may magandang bukas

kabataan na'y sangkot

sa paglaban sa buktot

na trapong nangurakot

na dapat mapanagot

iyan ang sigaw namin

ang kurakot ay krimen

sa bayan at sa atin

dapat silang singilin

Tula 2

PONDOHAN ANG EDUKASYON, DI ANG KORAPSYON 

(13 syllables per line)

ang isinisigaw ng kabataan ngayon

pondohan ang edukasyon, di ang korapsyon

sa aming kabataan, ito'y isang hamon

na dapat dinggin ng namumuno sa nasyon

anang DepEd, dalawampu't dalawang klasrum

lamang umano ang nagawâ ngayong taon

sa sanlibo pitong daang target na klasrum 

aba'y wala pa sa isang porsyento iyon

mga bata'y di makapasok sa eskwela

pagkat laging baha sa eskwela't kalsada

sa Bulacan ang flood control ay ghost talaga

mga kontraktor ay nagtabaan ang bulsa

kaya ang panawagan naming kabataan:

edukasyon ang pondohan, di ang kawatan

korap, managot para sa kinabukasan

buwis at pondo ng bayan ay protektahan

mabuhay ang mga kabataan ng masa

at mabuhay ang Partido Lakas ng Masa

para sa kinabukasan ay magkaisa 

korapsyon wakasan! baguhin ang sistema!

Tula 3

PANGARAL NG AKING AMA'T INA

(10 syllables per line)

iginagapang ako ni ama

nang makatapos sa pag-aaral

at inaasikaso ni ina

kaya busog ako sa pangaral 

pinangaralang huwag magnakaw

kahit piso man sa kaibigan

habang pulitiko'y nagnanakaw

ng bilyones sa kaban ng bayan

bakit ang masama'y bumubuti

at ang mga tama'y minamali

baliktad na mundo ba'y mensahe

ng mga pulitikong tiwali

sana makagradweyt pa rin ako

kinabukasa'y maging maayos

habang ako'y nagpapakatao

nakikipagkapwa kahit kapos

Tula 4

KABATAAN PA BA'Y PAG-ASA

(10 syllables per line)

binabahâ kami sa Bulacan

di na makapasok sa eskwela

bahang-baha sa mga lansangan

walang madadaanan talaga

dati may sakahan pa si tatay

ito na'y naging palaisdaan

dati pipitas kami ng gulay

ngayon, nawalâ iyong tuluyan

dati, gagawa kaming proyekto

katulad halimbawa ng parol

ngayon, may proyekto ang gobyerno

ngunit iyon pala'y GHOST flood control

kabataan pa ngâ ba'y pag-asa?

bakit nasa gobyerno'y kurakot

bakit nangyayari'y inhustisya

bakit korap ay dapat managot

kaylaking pwersa ng kabataan

kaya dapat lang kaming lumahok

upang lumikha ng kasaysayan 

na palitan ang sistemang bulok

- gregoriovbituinjr./11.22.2025

Ayaw natin sa lesser of two evils

AYAW NATIN SA LESSER OF TWO EVILS

bakit papipiliin ang bayan

sa sabi nga'y "Lesser of Two Evils"

isa ba sa dalawang demonyo

ang magliligtas sa sambayanan?

HINDI, di tayo dapat pumili

sa sinumang demonyo't kawatan

piliin natin lagi'y mabuti

para sa lahat ng mamamayan

ano bang dapat nating piliin?

Kadiliman ba o Kasamaan?

Mandarambong o mga Kawatan?

Kurakot o Kasinungalingan?

piliin natin ang Kabutihan!

ang kabutihan ng Sambayanan

dapat manaig ang Kabutihan

ng bayan, buhay, kinabukasan

ayon nga sa ating Konstitusyon:

ang "Public Office is a public trust"

"Sovereignty resides from the people,

all authority emanates from them."

itayo: Peoples Transition Council

upang iwaksi ang trapo't evil

taumbayan na'y di pasisiil

sa dinastiya, burgesya't taksil

- gregoriovbituinjr.

11.20.2025

* litrato mula sa google

Mag-ingat po

MAG-INGAT PO

mag-ingat po sa nandurukot sa pondo ng bayan

mag-ingat po sa mga nandarambong at kawatan

mag-ingat sa nambuburiki sa kaban ng bayan 

maging alisto lagi tayo, mga kababayan

ibinubulsa ng mga trapo ang ating buwis

nagsipagbundatan kaya sila nakabungisngis

bilyong pisong pondo'y kinurakot, parang winalis

habang sa hirap, karaniwang tao'y nagtitiis

buwayang walang kabusugan, kaylaki ng bilbil

habang mga maralita, sa asin nagdidildil

O, Bayan ko, sa ganyan, kayo pa ba'y nagpipigil?

di pa ba kayo galit sa gawâ ng mga taksil?

sa ganitong nangyayari, bayan ang mapagpasya!

halina't tayo'y kumilos, baguhin ang sistema!

wakasan! kurakot, dinastiya, oligarkiya!

itayo ang lipunang pantay at para sa masa!

- gregoriovbituinjr.

11.20.2025

Hilakbot ng kurakot

HILAKBOT NG KURAKOT

hilakbot ng kurakot

ay nakapanlalambot

dapat silang managot

sa inhustisyang dulot

sa bayang binabalot

ng sistemang baluktot,

oligarkiyang buktot

dinastiyang balakyot

sadyang nakatatakot

ang gawa ng kurakot:

krimeng may pahintulot

di man lang nagbantulot

batas na'y binaluktot

ang kaban ay hinuthot

ang buwis ay dinukot

bilyong piso'y hinakot

ng mga trapong buktot

at kuhilang balakyot

na dapat lang managot

at walang makalusot

bansa'y nangingilabot

sa mga ganyang gusot

krimen nilang dinulot

sa bansa nga'y bangungot

- gregoriovbituinjr.

11.20.2025

* litrato kuha sa Plaza Bonifacio sa Pasig noong Nobyembre 8, 2025, bago magsimula ang Musika, Tula, Sayaw sa "Pasig Laban sa Korapsyon"

Sa pagluwas

SA PAGLUWAS

doon sa kanluran / ako'y nakatanaw 

habang makulimlim / yaring dapithapon

hanggang sa nilamon / ng dilim ang araw

tila ba nalugmok / sa tanang kahapon

di lubos maisip / ang kahihinatnan

ng abang makatâ / sa pakikibaka

iwing tula'y punyal / sa abang lipunang

minanhid na nitong / bulok na sistema

sa silangan naman, / aking ninanais

ay maghimagsik na / ang mga naapi:

uring manggagawa't / masang anakpawis

batà, kabataan, / pesante, babae

sa aking pagluwas, / dala'y adhikain

at asam ng bayang / tuluyang lumayà

sa pagiging mga / sahurang alipin

maglingkod nang tunay / sa obrero't dukhâ 

- gregoriovbituinjr.

11.19.2025

* mapapanood ang munting bidyo sa kawing na: https://web.facebook.com/share/r/19jxFVwRDx/ 

Mga Buwayang Walang Kabusugan

MGA BUWAYANG WALANG KABUSUGAN

kung si Gat Amado V. Hernandez

ay may nobelang "Luha ng Buwaya"

balak kong pamagat ng nobela:

"Mga Buwayang Walang Kabusugan"

na tumatalakay sa korapsyon

doon sa tuktok ng pamahalaan

iyan ang isa kong nilalayon

kaya buhay pa sa kasalukuyan

kaya inaaral ko ang ulat

bawat galaw ng mga pulitiko

silang anong kakapal ng balat

oligarkiya't dinastiyang tuso

binaha tayo dahil sa buktot

na pulitikong nagsipagbundatan

pondo ng bayan ay kinurakot

ng mga mandarambong o kawatan

kontrakTONG, senaTONG, at TONGgresman

sa bayan ay dapat lamang managot

panagutin, ikulong, parusahan!

ang mga buktot, balakyot, kurakot!

baguhin ang bulok na sistema

nilang buwayang walang kabusugan

nang sila'y di na makabalik pa

nang kaban ng bayan, di na masagpang

- gregoriovbituinjr.

11.16.2025

* litrato mula sa Philippine Star na nasa kawing na: https://www.facebook.com/photo.php?fbid=1325324652964744&set=pb.100064616655120.-2207520000&type=3 

* litrato mula sa SunStar Davao na nasa kawing na: https://www.facebook.com/photo/?fbid=1298579265643619&set=a.583843763783843 

* litrato mula sa Philippine Movement for Climate Justice (PMCJ) na nasa kawing na: https://www.facebook.com/photo/?fbid=1265911858906521&set=pcb.1265914755572898 

This is where your taxes go: KURAKOT!

THIS IS WHERE YOUR TAXES GO: KURAKOT!

saan napunta ang buwis ng taumbayan?

tanong iyan ng ating mga kababayan:

OFW, manggagawa, kabataan,

kababaihan, dukha, simpleng mamamayan

saan? nasa bulsa ng buwayang kurakot!

saan pa? sa bulsa ng buwitreng balakyot!

saan pa? sa bulsa ng tongresistang buktot!

ha? sinagpang pa ng ahas! nakalulungkot!

buwis iyon ng bayan! bakit ibinulsa?

para sana di binabaha ang kalsada

bata'y walang bahang papasok sa eskwela

obrero'y walang baha tungo sa pabrika

ay, kayrami palang buwaya sa Senado

insersyon sa badyet, sa ghost project daw ito

pulos mga buwitre naman sa Kongreso

na badyet sa Malakanyang ay aprubado

O, kababayan, anong dapat nating gawin

kung tayo ang botante't employer nila rin

mga kurakot ay ating pagsisibakin!

sa halalan, sila'y huwag nang panalunin!

- gregoriovbituinjr.

11.16.2025

* litrato mula sa google

Bumerang

BUMERANG

matapos raw ang kaytinding bagyo

matapos humupà ang delubyo

mababakas ang gawa ng tao

basura'y nagbalikang totoo

tinapon nila'y parang bumerang

tulad ng plastik sa basurahan

mga binasura'y nagbumerang

tinapon sa kanal naglabasan

parang mga botanteng nasukol

na binoto pala nila'y ulol

binotong sangkot sa ghost flood control

na buwis sa sarili ginugol

binoto'y mga trapong basura

na nagsisibalikan talaga

upang sa masa'y muling mambola

mga trapong dapat ibasura

at kung káya'y huwag pabalikin

ang dapat sa kanila'y sunugin

upang di na makabalik man din

basura silang dapat ubusin

- gregoriovbituinjr.

11.14.2025

* komiks mula sa pahayagang Bulgar, 11.13.2025, p.5

DPWH ba'y paniniwalaan pa?

DPWH BA'Y PANINIWALAAN PA?

mukhang DPWH nagpapabango

nasa headline sila ng isang pahayagan

nagsalitâ sa pananalasa ng bagyo

mga pambansang daan ay di madaanan

di mo na tuloy alam kung anong totoo

pag DPWH na ang nagsalitâ

silang pangunahing sa kurakot nabisto

ay mag-uulat sa bayan hinggil sa sigwâ

maniniwala ba o ito'y guniguni

tulad ng pinag-uusapang ghost flood control

aasahan ba ang kanilang sinasabi?

e, kawatan at sinungaling nga'y mag-utol

flood control project ba'y sasabihing maayos?

at di substandard ang gamit na materyales?

matitibay daw ang gawa kahit mag-unos

e, maraming binaha, duda'y di naalis

DPWH ba'y paniniwalaan

ng bayang galit sa mga trapong kurakot

ahensyang pangunahin nga sa kurakutan!

O, DPWH, dapat kang managot

- gregoriovbituinjr.

11.13.2025

* litrato mulâ sa headline ng pahayagang Pang-Masa, Nobyembre 11, 2025

Korapsyon: Kung anong bigkas, siyang baybay

KORAPSYON: KUNG ANONG BIGKAS, SIYANG BAYBAY

ni Gregorio V. Bituin Jr.

Nabasa ko ang sinulat ni National Artist Virgilio S. Almario sa kanyang kolum na Filipino Ngayon sa pesbuk hinggil sa baybay ng salin sa wikang Filipino ng corruption. Tinalakay nga niya kung korupsiyon ba o korapsiyon ang tamang salin. Basahin ang kanyang sanaysay na may pamagat na KORUPSIYON O KORAPSIYON? sa kawing na: https://web.facebook.com/photo?fbid=1403137705151190&set=a.503294381802198

Pansinin. Sa dalawang nabanggit na salitâ ay kapwa may titik i sa pagitan ng titik s at y. Hindi niya binanggit ang salitang korapsyon. Palagay ko'y dahil mas akademiko ang kanyang talakay.

Sa karaniwang manunulat tulad ko, natutunan ko ang isang batas sa balarila na nagsasabing kung anong bigkas ay siyang baybay. O kung paano sinabi ay iyon ang ispeling.

Kaya sa wari ko ay walang mali sa salitang korapsyon o kaya'y kurapsyon. Di tayo tulad ng mga Inglesero na talagang mahigpit sa ispeling.

Ang salitang korapsyon ang ginamit ng mga taga-Pasig sa kanilang konsiyertong Pasig Laban sa Korapsyon noong Nobyembre 8, 2025, kung saan isa ako sa naimbitahang bumigkas ng tulâ hinggil sa nasabing napapanahong isyu.

Kaya ang salitang korapsyon ang gagamitin ko sa ipapagawa kong tarp para sa paglahok sa isang konsyerto sa Nobyembre 22, kung saan nakasulat: National Poetry Day 2025: TULA'T TULIGSA LABAN SA KORAPSYON. Planong ganapin iyon sa isang komunidad ng maralita sa Malabon. Tutulâ ako sa konsiyerto bilang sekretaryo heneral ng pambansang samahang Kongreso ng Pagkakaisa ng Maralitang Lungsod (KPML).

Ang salitang iyon din ang madalas kong gamitin sa pagkathâ ng tulâ. At iyon din ang naisip kong gamitin sa isang munting aklat ng tulâ na ilalabas ko sa Disyembre 9, kasabay ng International Anti-Corruption Day. Ang nasabing libreto, na sukat ay kalahating short bond paper at nasa limampung pahina, ay may pamagat na TULA'T TULIGSA LABAN SA KORAPSYON.

Gayunman, iginagalang ko ang pagtingin ni Rio Alma (sagisag sa pagtulâ ni V. S. Almario) hinggil sa korupsiyon o korapsiyon. Si Sir Rio ay naging gurô ko sa pagtulâ sa LIRA (Linangan sa Imahen, Retorika at Anyo) nang kumuha ako ng pagsasanay rito mula Setyembre 1, 2001 hanggang grumadweyt dito noong Marso 8, 2002.

Halina't abangan ang paglulunsad ng munting aklat laban sa korapsyon sa Disyembre 9, ang pandaigdigang araw laban sa korapsyon. Inaayos lang ang lugar na paglulunsaran ng aklat.

11.12.2025

P.S. Salamat kay Ninong Dado sa litrato

Sana, Bagyo, tinangay mo na ang mga kurakot!

SANA, BAGYO, TINANGAY MO NA ANG MGA KURAKOT!

kayrami nang namatay sa bagyong Tino sa Cebu

si bagyong Uwan, nanalasa sa bansa ni Juan

sana ang tinangay nila'y korap na pulitiko

na nagpakasasa't nandambong sa pondo ng bayan

sana, namatay sa bagyo'y yaong mga kurakot

na birthday wish ng broadcaster na si Ms. Kara David

sana, inanod sa baha'y mga trapong balakyot

at di yaong mga mahihirap nating kapatid

bagyuhin sana'y mga kurakot sa ghost flood control

na nagsibukol ang bulsa sa nakaw nilang pondo;

salamat po, Sierra Madre, sa iyong pagtatanggol

sa maraming kababayan, lungsod at munisipyo

subalit kayrami mang SANA, baka di matupad

kung tao'y di kikilos upang ibagsak ang bulok

kung ang gulong ng katarungan ay sadyang kaykupad

at nanunungkulan pa rin ang mga trapong bugok

- gregoriovbituinjr.

11.11.2025

* litrato mula sa pahayagang Remate, 11.08.2025    

Lagot sila kay Agot

LAGOT SILA KAY AGOT

artistang si Agot Isidro, may tanong sa atin

di palaisipan ngunit ating pakaisipin:

"Kung kayo si Sierra Madre, sinong iboboto n'yo?"

na sinundan pa, "Yung papayag na kalbuhin kayo?"

may pasaring pa, "Panay ang Salamat Sierra Madre,

pero iboboto, yung mga pro-mining." mensahe

n'ya'y tagos, anya pa, "So alam na next election ha."

simpleng pahayag, sa puso'y kumukurot talaga

sa ulat ay nagawa raw ng mga kabundukan

ng Sierra Madre puksain, mata ng bagyong Uwan

kaya maraming sa Sierra Madre nagpasalamat

tila isa itong paanyayang gawin ng lahat

maraming salamat sa mga pasaring mo, Agot

sa mga minahang naninira ng mga bundok

lalo sa mga pulitikong kurakot at buktot

na nararapat lang na mapiit at mapanagot

- gregoriovbituinjr.

11.11.2025

* ulat mula pahayagang Abante, 11.11.2025, p.5

Ang demokrasyang batid ng dinastiya

ANG DEMOKRASYANG BATID NG DINASTIYA

Ang demokrasya raw ay

OF the prople,

FOR the people,

and BY the people

na mababasa

sa Gettysburg Speech

ni Abraham Lincoln

subalit iba

ang pagkaunawa

ng dinastiya

sa demokrasya,

o marahil nga'y

iniba nila:

Sa kanila

ang demokrasya ay

OFF the people,

POOR the people,

and BUY the people.

hindi kasama ang tao

pahirapan ang tao

at bilhin ang tao

o marahil

ang POOR the people

ay POUR the people

ng mga ayuda

upang iboto

muli ang trapo

- gregoriovbituinjr.

11.10.2025

* mga litrato mula sa pahina ng Partido Lakas ng Masa (PLM)

Panawagan nila'y parusahan na ang mga kurakot!

PANAWAGAN NILA'Y PARUSAHAN NA ANG MGA KURAKOT!

kinunan ko ng litrato nang makita ang panawagan

na "Parusahan ang mga magnanakaw sa ating bayan

at mga kasabwat na Kontraktor, Senador at Kongresman"

ng UP Workers Union, aba'y sang-ayon din ako riyan

ang mga kurakot, pag di naparusahan, babalik din

sa kanilang krimen at karumal-dumal nilang gawain

imbes magsilbi sa bayan, bulsa nila'y pabubukulin

kawawa muli ang bayan sa mga buwayang salarin

kaya dapat parusahan lahat ng mga nasasangkot

at nandarambong sa pondo ng bayan, silang mga kurakot

dapat may mga ulong gumulong, kundi man ay mapugot

parusahan na sila hanggang buto'y magkalagot-lagot

kaybilis ng batas mamarusa pag dukha ang nang-umit

ng isang mamon upang may mapakain sa kanyang paslit

ngunit pag mayayamang bilyon-bilyong piso na'y kinupit

may due process pa ang mga walanghiyang dapat mapiit

- gregoriovbituinjr.

11.10.2025

Bato-bato sa langit

BATO-BATO SA LANGIT

Bato-bato sa langit

Hustisya'y igigiit

Pag ginawâ ay lupit

Sa dukha't maliliit

Kayraming pinilipit

Pagpaslang ang inugit

Due process ay winaglit

Mga buhay inumit

Tulad ng abang pipit

Pag bayan ay nagalit

Sa tokhang na pinilit

Bato man, ipipiit

Nanlaban pati paslit?

Tanong natin ay bakit?

Buhay nila'y ginilit

Ng sistemang kaylupit

- gregoriovbituinjr.

11.09.2025

Pasig Laban sa Korapsyon

Pasig Laban sa Korapsyon

Isang Mabigat na Misyon

Tunay na Dakilang Layon

At Tanggap Natin ang Hamon!

- gregoriovbituinjr.

11.08.2025

* Kinatha at binigkas na tulâ sa Musika, Tulâ at Sayaw sa Plaza Bonifacio, Pasig, 11.08.2025 

Paalala para sa Disyembre 9: International Anti-Corruption Day

PAALALA PARA SA DISYEMBRE 9: INTERNATIONAL ANTI-CORRUPTION DAY

higit isang buwan pa ang palilipasin

ay talagang pinaghahandaan na natin

ang araw laban sa korapsyon at kurakot

na pondo ng bayan ang kanilang hinuthot

batid nating pinaghahandaang totoo

ay yaong araw ng karapatang pantao;

ang nakakatakot ay baka malimutan

ang mismong isyung kinagagalit ng bayan:

ang korapsyon, kurakutan ng mandarambong

sa pondo ng bayan, kaya isinusulong

kilalanin ang araw laban sa kurakot

pandaigdigang araw laban sa balakyot

ang araw bago Universal Human Rights Day

ay ang International Anti-Corruption Day

ito ang isyu ngayon,  at matinding isyu

dapat tayong lumabas sa araw na ito

huwag nating hayaang basta makalampas

ang Disyembre Nuwebe, at huwag lumipas

na parang pangkaraniwang araw, dapat ngâ

tayo'y magrali, kurakot ay matuligsâ

- gregoriovbituinjr.

11.07.2025

Pribatisasyon at korapsyon

PRIBATISASYON AT KORAPSYON 

pribatisasyon at korapsyon

kambal na buwayang lalamon

sa bayan, para ring buwitre

o mga ahas na salbahe

masa'y dinala sa ayuda

namayagpag ang dinastiya

sinapribado ang NAIA

tila NHA pribado na

EO 34, 4PH ngâ

na di pala para sa dukhâ

may PAG-IBIG, di pwede walâ

pribatisasyon na ring sadyâ

sa R.A. 12216 ngâ

nasa relokasyon kawawâ

pag bahay ng dukha'y mawalâ

dahil di nagbayad ng akmâ

pati RA 12252

na pinirmahan ng pangulo

99 years upa ng dayo

sa mga lupa natin dito

krisis na ito'y alpasan na

baguhin natin ang sistema

patuloy na mag-organisa

sistemang bulok, alpasan na!

- gregoriovbituinjr.

11.04.2025

* tulang nilikha at binigkas ng makata sa pagtitipon ng mga manggagawa sa UP SOLAIR (School of Labor and Industrial Relations)

Machiavellian daw ba ang mga kurakot?

MACHIAVELLIAN DAW BA ANG MGA KURAKOT?

Machiavellian daw ba ang mga kurakot?

sa pulitika'y di dapat lalambot-lambot

leyon at soro ang liderato ng buktot

na dapat masa sa ulo'y kakamot-kamot

masang sunud-sunuran at di pumapalag

bigyan lang ng ayuda, sila na'y panatag

masa'y bubulong, di lantad kung magpahayag

mata'y pipikit kahit maraming paglabag

tulad ng mga tipikal na pulitiko

laging bilugin ang ulo ng mga tao

kahit gumawa ng krimen upang umano

sa mga ambisyong pampulitika nito

kaya nga nagnanakaw sa kaban ng bayan

iyang mga buwayang walang kabusugan

na sa galit ng masa'y walang pakialam

dahil sila'y may kamay na bakal daw naman

dapat ilantad ang gawi ng mga korap

dahil sa bansa, sila ang mga pahirap

mga trapo'y ibagsak ang dapat maganap

upang maitayo ang lipunang pangarap

- gregoriovbituinjr.

11.03.2025

* Ang taga-Florence na si Niccolo Machiavelli ang awtor ng The Discourses, at ng The Prince na political treatise hinggil sa pamumuno

Ikulong lahat ng mga kurakot

IKULONG LAHAT NG MGA KURAKOT

patuloy nating ibulong ang isyu

o kaya'y ipagsigawan na ito

upang maraming makaalam nito

upang sumama sa pagkilos dito

sadyang nakapanginginig mabatid

ang ginagawa nilang paglulubid

ng buhangin na animo'y makitid

ang kaisipan ng masang kapatid

ay, guniguni pala ang flood control

habang mga bulsa nila'y bumukol

katakawan nila'y sadyang masahol

pagkat buhay ng masa'y naparool

tumindi talaga ang kahirapan

pati na pagbabaha sa lansangan

masa'y dinala nila sa kangkungan

bansa'y tinangay nila sa putikan

ang mga tulog pa'y ating gisingin

ang mga gising na'y organisahin

isyung ito'y ipaliwanag man din

sa masang galit nang hustisya'y kamtin

ikulong lahat ng mga kurakot

na pati hustisya'y binabaluktot

ikulong na ang mga trapong buktot

ikulong lahat ng tuso't balakyot

- gregoriovbituinjr.

11.03.2025