PAGTUNGANGA
napatunganga muli sa kawalan
tila nahipan ng hanging amihan
animo gagawin ay di malaman
habang naglalaro ang nabungaran
paano ba mamatehin ang hari
ng sablay na laging napapangiwi
ang reyna at tore'y di mo mawari
habang piyon ay nagtangkang magwagi
tila nanonood lamang sa wala
di pa lumitaw ang kislap sa diwa
baka dumating ang mutya mamaya
ay biglang matulala, mapatula
para bang naritong nananaginip
sa diwa'y walang anumang mahagip
bagamat sa puso'y may halukipkip
na tila baga walang kahulilip
- gregoriovbituinjr.
02.05.2024
No comments:
Post a Comment